陳家俊 - 足球小伙子變健身教練「鐘意就百份百投入去做，做到最極緻」

2023年12月12日

【Never Give Up 專欄】今次我們邀請到曾經參與健美比賽，亦是前香港甲組足球員，兼職健身教練的陳家俊（KC）做我們運動員專訪的嘉賓。在健身室內，KC 戴上咪高峰試聲音就講："霞姨！試咪！一盒叉燒飯唔該！" 的確是一位十分有趣的健身教練，但當訪問中提及到健身有關的問題，就變得認真及專業。訪問中，最令我們深刻的一句說話：

「我個人就係咁，好鐘意嗰樣野就會百份百投入去做，做到最極緻」

足球小伙子變健身教練

KC 是前香港甲組聯賽足球員，曾經參與過黃大仙、油尖旺、凱景、愉園、大埔甲組球隊，由小學開始已經熱愛足球，小學到大學都是校隊成員，直到大學遇到了運動員的最大敵人—傷患，才接觸了健身運動。「細細個就鐘意踢波，一開始係屋村踢波，踢到而家都仲踢緊，以前入左一隊波叫夢幻龍，就真係正式開始比賽。足球俾左好多野我，有成功感、成就感，奈何因為傷患，所以就少左踼波，反而接觸左健身」

每一位運動員曾經都可能被傷患影響過，甚至放棄，但機緣巧合下，反而令 KC 認識到健身運動「大學果次傷得好嚴重，拉傷膕繩肌（Hamstring），因為大專生涯時間好短，所以一好返少少就心急，落場就用力跑，點知一傷就傷左半年。大學果陣一個星期要練四課足球，我就四課都要係健身室入面，所以就真正接觸左健身。一試就好投入咁鐘意左，好想係健身範疇入面認識更加多，想了解點可以令自己係健身方面有體格上進步。」

大學畢業後，雖然 KC 都有繼續踢足球，但因為工作及體能問題，少左參與足球比賽，同時想增強體能，所以在健身室時間都增加了「年紀大左體能冇咁好，就去操野，横掂咁鐘意操野，就不如玩下健美比賽啦，咁個成績都好滿意，有個第四名，玩完之後就發現更鐘意健身，更加認識到健身有好多野玩」

「一係就唔試，一試就百份百投入咁去做！」

健美比賽吸引之處

一般人看健美比賽，只看到台上運動員展現一身肌肉的華麗表現，但就如其他運動一樣，場上一分鐘，台下十年功。KC 一樣在華麗背後卻滿是辛酸，他直言最難捱的反而是凌晨起床「對於我黎講，最辛苦一定係要我凌晨四點起身踩 Cardio 機（帶氧訓練），跟住朝早返工，直踩到下午四至五點，放工再揸車入去元朗搵師父操野，十點幾十一點就返屋企，再凌晨４點起身踩機... 果四個幾月嘅生活都係咁過，食野都未算辛苦，因為起碼有得食」。

健美是「自己的戰鬥」

KC 進行了四個月的地獄式特訓，收獲是大大的滿足感「特別係參加比賽後，可以睇到自己身體變化，可以有好大差距，好有滿足感，健美係好靠自己去做，少啲意志同少啲堅持都難去完成，重點係你一唔堅持你就一定會輸，因為你啲對手同你係做緊同一樣野，你一定要比佢地更加刻苦、更加堅持先會有一個好成績出黎」

「健美比賽你少啲意志力，少啲堅持，就一定會輸！」

超越自己，對得住自己

參與得比賽，有誰會不想勝出？但勝出只有一位，KC 對比賽有一番體會「對手有成19人，唔想攞獎就假嘅，一定會想有名次。但當裁判叫 First call out，我已經當自己贏咗左，其實真正踏上台一刻，已經係唔會再著緊有冇獎，係咩名次，因為你見到個個都差唔多嘅時候，你知道過程冇後悔，盡晒力，你已經唔會有同人比較嘅心！最後拎左第四，都有個獎牌仔，對得住自己，就無憾。」

「行到上個台度，就已經當自己贏左，無憾！」

艱苦，但不會放棄

問到 KC 有冇想過要放棄，他表示「有諗過架，但真係唔多。最辛苦都係好早起身踩機，特別係比賽前要 Cut 碳果陣，個人係完全冇精神，冇力，容易燥底！加埋本身做教育行業面對好多野，當刻覺得呢個世界好煩，我咁辛苦為咩呢？但本身係自己話想要參加，我都差唔多到最尾，問自己點解唔做埋佢呢？點解要放棄呢？盡做，得出黎個結果起碼對得住自己，對得住所有幫過你嘅人，到最後都堅持埋落去。」

「係好辛苦架，但會問自己點解要放棄呢？盡做起碼對得住自己！」

喜歡挑戰自己

Never Give Up 正在舉行考牌四線行山挑戰，問 KC 有否興趣參與挑戰，他興奮不已：「我好鐘意行山架，香港有好多山都行過，頭先有提及過，我好鐘意挑戰自己，我就上網 Search 下最難行嘅山係咩野，叫做鬼手岩，我都有去征服左佢，個時間係 12 個鐘行完。」意想不到，KC 都已經征服了鬼手岩，他更表示會參與我們提供的四線挑戰，領取所有獎牌！

「上網見到最難行嘅山係 "鬼手岩"，我就征服佢！」

人生格言

訪問尾聲，每位嘉賓我們都一定會分享人生中的格言，以及 Never Give Up 對嘉賓代表什麼，秉承以生命影響生命「我真係有人生格言架！啲人成日話堅持好難，放棄好容易；但對我黎講，堅持反而好容易，放棄好難！因為當我鐘意嗰樣野，放棄真係唔係咁容易做得到！就好似 Never Give Up 咁，都好符合我做人，當你決定左去做一樣野，就唔好放棄囉，不論個結果係成功或失敗都好，最緊要就係唔好令自己後悔！」「放棄會令自己人生有遺憾，人生其實好短暫，去到老果陣就會諗返，點解果陣唔做埋佢呢？但如果你當時有做，到你老果陣就會諗返，好彩當時有個好美好回憶」