【Never Give Up 專欄】近年有不少以運動主題的電視節目播映引起了不少迴響，例如冰球有「冰上火花」；籃球有「季前賽」；排球有「男排女將」；游泳有「I Swim」；拳擊有「繩角」；空手道有「打天下」等等，大部分故事講述一班年青人喜愛運動，懷著熱血和衝勁，勇敢追夢！今次專欄邀請了一位身懷十八般武藝，運動斜杠青年 Caleb 陳以謙 做專訪。Caleb 自小開始接觸運動，小學開始玩冰球；中學玩劍撃，再玩潛水、單車、排球等等... 每項運動都認真對待，唔係玩玩下咁簡單，甚至加入香港隊，在香港體育學院訓練。

 

「我今年20歲，小學開始打冰球，中學加入左劍擊港隊」

冰球

Caleb 小學已經開始玩冰球，在香港算是一項冷門運動，使用的場地不算很大，長約61公尺，闊26公尺，所以滑冰速度快、球權轉換頻繁，講求高速度、力度和合作，是一項非常刺激兼具挑戰性的運動賽事。「屋企人由我細個開始俾我玩 Ice Hockey，我本身好鍾意溜冰帶俾我嘅速度感，係冰上跑可以不停加速，好舒壓，好放鬆，再加埋冰球嘅團體精神，所以我好鍾意打冰球！」

「外國啲 Ice Hockey 影片睇落好似好危險，但其實有好多保護裝備去保護運動員，點解啲運動員睇落咁大舊，因為佢地着咗好厚嘅保護衣物，又有頭盔同手套，全部都係防止運動員受傷，所以我覺得就唔係好危險。」其實有部份在冰場上的嚴重事故都是很罕見，例如前陣子有名冰球聯盟球員 Adam Johnson 在比賽期間，嘗試阻截對手時發生碰撞，被對手的冰鞋刀鋒割傷頸部致嚴重失血。這些意外都只是個別例子，並非等於冰球是一項危險運動。

 

「我鍾意速度感，係冰上跑可以不停加速！加速！加速！」

點解會轉左去玩劍撃？

「以前小學放學就去溜冰場練冰球，直到小五升小六嘅暑假，有位同學個爸爸係劍擊教練，玩左咁多年冰球，我都想試下玩其他野，所以就玩左劍擊，一玩又玩左６-７年」「到中學就全心放係劍擊，劍擊一星期練四至五課，慢慢打到有成績，入左香港隊，放學就入體院訓練，星期六日都係咁，所以開始少左時間玩其他運動。」

 

轉換主項運動，你覺得有咩分別？

「我未入港隊前對自己冇咁高要求，可能比賽到8強就已經係我目標，但入左港隊之後，每次比賽我都一定要衝頭四強，壓力大左好多，因為多人識左，有人開始會研究自己嘅打法，會俾人當左自己係假想敵。」

Caleb 由玩團體項目，轉到個人項目，不論練習方式或者心態方面，相信一定有好大分別。「冰球係團體運動，劍擊係個人運動，一個贏輸都會有隊友喺隔籬支持；另一個就贏輸都要自己面對。比賽方式都好唔同，劍擊可能一日就打晒；冰球可能要打小組，要比賽幾日。」

「劍擊最好玩係所有嘢都要自己諗，打緊比賽其實好多嘢去思考，例如下一劍要點樣打，要自己去試，好多野觀察。不停諗點樣解到對手啲招，辛苦左好耐，跟住拎到一分就好開心，好有滿足感！」

 

「冰球係團體運動，劍擊係個人運動，好大分別！」

心態調整

「狀態差打得唔好果陣，我完左一劍會自己綁吓鞋帶，等自己平靜下，好好思考下一劍要點樣做。我會成日提自己重返基本步，慢慢做返好啲步法，做返好啲試探，好似平時練習熱身咁樣，睇吓搵唔搵到解決辦法。」

「果陣有啲小組賽打得好差，勉強出線，當時會諗自己入咗港隊，我一定係要幫手贏晒啲對手，會有咁嘅心態。所以好緊張好大壓力，有啲水平冇咁高嘅對手我都輸咗，驚人哋可能會諗呢個港隊點解會咁嘅！但打耐咗，我越嚟越相信自己，覺得自己係得，盡量放鬆打，用啲最簡單直接嘅得分方法，唔好諗太多。」

雖然 Caleb 只有 20 歲，但整個訪問都感覺到佢有一顆強心臟，好自強好獨立，原來心態咁成熟，同佢家庭都好有關係「我覺得我有呢種心態係因為個原生家庭，我係屋企嘅獨仔，好多嘢都係要自己一個，屋企人要返工，我要自己一個返屋企，好多解決方法都要自己去搵。所以打劍果陣時都會自己冷靜去思考，還原基本步，去諗最簡單最容易嘅方法解決。」

 

「我越嚟越相信自己，盡量放鬆打，用最簡單直接嘅方法得分，唔好諗太多！」

運動斜杠青年

Caleb 除咗玩劍擊同埋冰球，佢仲好喜歡踩單車、潛水、打排球等等。唔止簡單玩，佢仲係認真玩，每一項運動都達到專業水平，考咗唔同牌照。「本身自己鍾意踩單車，就同班 Friend 一齊去玩公路單車，又型，又可以享受速度感！跟住入咗柴灣 IVE 讀運動教練學高級文憑，有一科係主修單車，可以試到唔同嘅單車項目，例如山地單車、小輪車、場地單車，最驚喜就係玩場地單車，同平時公路單車好唔同，佢係冇煞掣，好好玩，好有速度感！」

「潛水就係因為睇到人哋YouTube啲片好靚，所以就好想去考，點知一試咗，發現原來水底唔係靚咁簡單，係有一種寧靜感。可能咩都聽唔到，但係你會見到好多嘢，感覺到好多嘢，好平靜。如果比賽好大壓力好緊張，我一落水就可以搵到個平靜感，好放鬆！我嚟緊想考埋潛水教練，目標好想教啲唔識游水嘅人潛水，因為唔識游水嘅人都可以潛水！」

 

「水底唔係靚咁簡單，係有一種寧靜感」

Never Give Up 代表什麼?

「其實我成日都同自己講 Never Give Up，有陣時好攰，唔想再打啦，但自己都會同自己講：都去到呢一步啦，打埋佢先唞啦！有時想放棄，返到屋企都會同自己講：都俾咗咁大努力，點解唔打埋下一次做到最好呢？今次都未係最好。」「我好鍾意一句格言，Diamonds are made under pressure。如果一個人冇壓力，就唔會成就到一個更好嘅自己！」

訪問最後我哋都俾咗一個難題 Caleb，你玩過咁多項運動，個人運動同埋團體運動，你會揀邊一樣？「咁多種運動，我都係最鍾意團體運動，例如排球同埋冰球，因為每一次贏波，都有一班人一齊慶祝，我好鐘意呢種氣氛，所以嚟緊都會集中喺呢兩種運動。」「我有個目標，我好想打返冰球，香港溜冰場好少，想推廣冰球。另外我岩岩打咗排球一年，好鍾意呢個團隊精神，所以嚟緊都想喺排球嗰邊發展多少少」

 

「Diamonds are made under pressure！如果一個人冇壓力，就唔會成就到一個更好嘅自己！」

 

By Ho.W.K.

NGU