B-boy FourEyes 吳耀昌 - 香港霹靂舞教練「為左跳舞，可以去到好盡」
【Never Give Up 專欄】Breaking 中文譯作「霹靂舞」，是街舞舞風的其中一種，2024年將成為巴黎奧運會的比賽項目之一，熱浪席捲全世界，其實一直都有不少受注目的街舞電影上映，例如最知名的《舞力全開 STEP UP》系列，一共拍了5集；而香港亦有代表作《狂舞派》及續集《狂舞派3》的熱血舞蹈故事。
今次 Never Give Up 嘉賓專欄十分利害，我地好榮幸邀請到 香港霹靂舞教練 B-boy Four Eyes 吳耀昌 做專訪，佢跳舞足足跳左19年，早兩年更擔任「香港霹靂舞奧運積分賽」裁判，現在主要著重教育方面，例如協助康民署推廣跳舞活動 及 教導學校跳舞體驗班等。除此之外，Four Eyes 仲有繼續做運動員身份去參與比賽，追求自己的目標。
「我叫 B-boy Four Eyes 四眼，我係香港跳左霹靂舞 19 年！」
當初點解會學 Breaking？
「15歲左右成日係 "蒲吧"（西灣河協青社青年中心）打籃球、同啲朋友玩，有一日見到有霹靂舞興趣班，好便宜，$100 有 8 堂，咁就試下報名，就接觸左霹靂舞。之後先發現原來教我地跳舞果個人，係當時最當打嘅霹靂舞者，果陣一個星期都有三四日係 "蒲吧" 跳舞，跳下跳下就跳左咁多年。」Four Eyes 係一個機緣巧合下接觸霹靂舞，正所謂接觸容易；維持最難，點解先可以堅持到19年都仲繼續跳緊？「因為 Breaking 真係好好玩，我跳左咁多年都未識晒 Breaking 入面咁多招數，不段有新鮮感俾我，右手練完，左手唔夠強又可以練左手，跟住練埋雙手，之後練步法又得，再玩埋地下難度動作、空中難度動作等等，所以跳左咁多年都不段嘗試，不段學習。」
「霹靂舞不段有新鮮感俾我，所以跳左咁多年。」
跳舞是一項藝術運動
「霹靂舞唔係單單一個運動，佢包含左藝術成份，例如大家上堂學嘅 Breaking 舞步可能會一樣，但跳出黎呈現嘅風格、感覺同想法都可以唔同，呢個就係好玩之處！到而家我都仲係好鍾意 Breaking！」Breaking 係一個以個人風格為主，藝術性質較強的運動，主要舞步以高難度動作聞名，舞者需要使用手、頭、身體在地上旋轉，並利用肢體在地上跳出複雜變化的腳步動作，快速的腳步、大動作的轉體，是一種難度較高的街舞。霹靂舞的動作普遍可以歸納成四大元素：搖滾步（TopRock）、排腿（Footwork）、大地板動作（Powermove）、定點（Freezes）。
「個個學嘅舞步一樣，但呈現嘅風格、感覺同想法都可以唔同」
跳舞 與 生活 的平衡
香港地搵食艱難，單單依靠正職都難以維生，更何況要課金去追隨自己興趣，簡直難上加難！但香港的確有不少為了興趣而食少兩餐的瘋人，Four Eyes 絕對係其中一位「一開頭出黎係做 Sales，收工都比較晏，可能10點收工，去跳一陣舞，跟住返去訓，第二日又返早，Keep住咁樣都兩三年。同埋 Sales 都比較難請假，但好多跳舞比賽都係星期六日，所以把心一橫就決定搵啲朝九晚六嘅工作，星期六日放假就可以比賽，同埋重點係6點放工可以去跳舞，咁樣可以維持到生計同跳舞。」
大家經歷過就知道，要係香港共存 興趣 同埋 生活 其實一點也不容易，Four Eyes 做左一個好大膽的決定，用工作去遷就喜愛的霹靂舞，「久而久之，我覺得工作占左我太多時間，唔夠時間投入跳舞，例如比較起外國嘅 B-boy，佢地平時生活其實係跳舞會比工作時間多，我地要夜晚放工得果少少時間先可以去跳舞，所以有一次我要去外國比賽，公司唔俾我請假，我就辭左工！」
「公司唔俾我請假去外國比賽跳舞，我就辭左工！」
為左跳舞，放棄工作。係香港最難係維繫生活，但對 Four Eyes 黎講，一點也不後悔，因為佢見到嘅世界比起工作更有價值「去完外國吸收左好多野返黎，消化後覺得我要更加擺啲心機去跳舞，我先可以去到 Next Level，所以果陣就決定左唔再返全職嘅工作，想做個全職 B-boy。」「做全職 B-boy 唔簡單，但我幾鍾意而家嘅生活模式，黎緊會入學校教霹靂舞體驗班，雖然唔係搵好多，但係過到生活，亦有好充分時間俾我練習！」
「更加放心機去跳舞，先可以到 Next Level，決定左唔返全職，做全職 B-boy」
認識及推廣街舞文化
提到街舞，大眾或許會有所誤解，認為是叛逆的代名詞，先入為主地將舞者與「街童」相提並論。以往文化中心、公園甚至天橋底都是舞者切磋、比舞的集中地，但慢慢被太多人報警驅趕，令舞者開始轉移陣地到室內舞室交流，令大眾更難認識街舞文化。「香港一定係少人玩啦！例如外國有啲比賽只要贏左香港Qualify，包晒機票住宿，都只係得 30 個 B-boy 去參加。其中一個原因係因為斷層，冇乜新人去跳，以前每一區都有隊 B-boy，而家黎黎去去都係果班。」「同埋霹靂舞一開始透明度比較低，又比人認為係街童，成日都有報導街童就係 B-boy，我唔認同！而家小朋友有太多野可以接觸，阿爸阿媽唔會俾你學一樣野，要學成幾樣野，變左冇一樣學得集中。」
「成日都有報導街童就係 B-boy，我唔認同！」
鑑於國際奧委會（IOC）期望吸引更多年輕人關注奧運，使奧運年輕化，霹靂舞一對一對抗（1-on-1 battle）落實成為2024年巴黎奧運的比賽項目，首次登上奧運殿堂，可算是對霹靂舞舞者的一種肯定，但宣傳及透明度仍然不足夠。「直至奧運宣布左有 Breaking 項目，先至有返啲13歲以下嘅 B-boy 出現，就算14-17歲青少年組，都係講緊參加人數得15個以內，成人組最多都係得大約30-40人。」「近幾年，睇到中國或者韓國都有好多跳舞節目，的確俾一般嘅觀眾睇到咩係 Breaking，Locking，Poping 等等。仲間接令到好多參加者變左明星，俾人多啲人認識跳舞係好事黎嘅，但唔好忘記初衷，繼續衝比賽去令自己進步。香港本身其實都有跳舞節目，可惜因為某啲原因暫停左。」
「跳舞係唔可以冇野追！一冇野追就唔知跳黎做乜！」
堅持繼續跳追夢 — 無懼跳到樽頸位
「而家可以同啲學生講，跳 Breaking 係可以跳到代表香港、參加奧運，起碼多左個夢想俾人追。」夢想同現實看似不能並存 ，但小編同 Four Eyes 傾完之後有好深體會，就係擁有夢想的人會更加懂得活在當下。只要你追隨內心真正想走的方向，不要說夢話，採取行動來把夢想轉化為目標。
「每次遇到樽頸位，我會同自己講要還原基本步，諗返點解一開始要跳舞！咁多年黎我都好靠跳舞嘅新鮮感俾野我去追同練。參加比賽不停提醒住我自己，有時會跳到冇咩 Feel、好攰，想抖下咁樣，但我一諗起黎緊四月有個美國比賽，我就會好有心有火咁繼續練落去，每一年都有好多比賽等我去打，我目標就放晒係外國比賽度。」
「可以同學生講：跳 Breaking 係可以跳到參加奧運，起碼多左個夢想俾人追！」
Never Give Up 代表什麼?
「好多人可以好多藉口去放棄跳舞，除左跳到樽頸位啦，一黎冇錢啦，二黎女朋友啦，大把因為識左女朋友放棄跳舞，大把外來因素去放棄。場地又可以係一個原因，但跳舞其實求其一個地下都可以跳，睇你去唔去做架姐。」
「我本身好少去講或者諗呢個字 Never Give Up，因為我覺得你夠熱愛呢個運動就唔會諗，所以我冇乜諗。成日啲人都會傾跳到幾多歲，但當你睇片，仲有個四五十歲做緊頭轉，咁點會放棄呀！」
「堅持到19年係因為我真心Feel到我自己堅鍾意呢個運動！由心出發！」
小編好想代表 Never Give Up 同你講一句 「Proud of you！我地會繼續支持你！多謝你分享運動、分享愛！」
By Ho.W.K.
NGU
