杜栢寧 - 香港滑板教練「滑板最好玩就係你點樣玩都得」
【Never Give Up 專欄】大眾一向對滑板的觀感，總是與「反叛」相提並論，經過滑板運動於2020年東京奧運被列入正式項目之後，立即除去了這個刻板的標籤，令更多人認識滑板運動。今次Never Give Up好開心邀請到香港滑板教練 - 杜栢寧 接受我地專訪！小編從未玩過滑板，對滑板亦有種無形恐懼，但經過今次專訪，小編最深感受係 栢寧 只係用左5分鐘，就能夠教導我安全滑下一個小斜坡，甚至有點心動想學滑板。
「純粹覺得滑板好玩，一踩（滑板）就踩咗二十幾年」
機緣巧合下接觸滑板運動
「Hello 我叫杜栢寧」小編初次見面，約左栢寧係柴灣池畔花園滑板場做訪問，場地唔算好大，有幾位板仔玩緊滑板，應該都認識栢寧，然後好隨意咁搵個地方開始做訪問「我一直都係踢波嘅，去到2000年見到有朋友踩滑板，無端端就接觸左滑板，一踩就踩咗20幾年。果陣同啲朋友一齊去買Scooter（滑板車），我自己就放左佢地飛機，走左入赤柱買真板（滑板），結果十幾個朋友最後都買咗真滑板。」
因為運動而聚在一起，相信好多人都經歷過，而栢寧都一樣「踩滑板識咗好多朋友，有啲識咗20幾年，純粹覺得滑板好玩，記得暑假會日日去踩，每日踩七至九個鐘」就係呢份純粹，就令栢寧接觸滑板運動。栢寧講到23年前，姐係ICQ同MSN年代，學滑板都唔係一件容易嘅事「主要係自學，有啲識玩少少嘅朋友指點下，但都唔知岩唔岩架。以前冇YouTube睇，最多睇下錄影帶，外國有個好出名拍滑板video 係叫411 VM，果陣時就成日睇佢啲錄影帶，而家有好多唔同YouTube片，當然方便好多，除左學習片之外仲有好多創作嘅片，栢寧就特別鍾意下面嘅影片，因為唔同嘅創作好睇之外，對推廣滑板運動都有更好的影響。
#來自Youtube的影片，栢寧推薦
轉職滑板教練
「完全冇諗過做滑板教練，真係機緣巧合，嗰陣疫情無乜嘢搞、無地方去，有朋友問我有冇興趣幫手教滑板，其實之前都有好多人問我可唔可以教佢踩滑板，但我都話玩吓就算啦。我而家都係part-time做，都唔係full-time教練。」23年都唔係一段短時間，堅持到角色轉換；堅持到滑板運動形象漸趨正面，一點也不容易！
「滑板最好玩就係你點樣玩都得」
其實滑板是什麼？
小編對栢寧有一句話好深刻「滑板最好玩就係你點樣玩都得，好freestyle，有啲人鍾意玩U型台、有人鍾意平地花式、有啲人鍾意碗池。」好隨意、不刻板，係小編對成個專訪嘅感覺。奧運的滑板分為街式賽（Street）及公園賽（Park）兩個項目，裁判以速度、動作、高度、創意、難度等評分。而滑板種類，栢寧當日坐著一塊滑板，隨即拎起介紹「普遍都係用呢一隻做花式滑板，有啲代步板可能個碌會有分別，令到行起上嚟冇咁震。至於護具，小朋友玩就一定會建議帶，因為佢哋初頭唔識跌低，帶返啲護具就會安全啲。」
香港滑板文化
對於很多年表人來說，踩板是很cool的運動玩意，有不同品牌都會加入板仔元素。對於踩板門外漢來說，小編對滑板品牌認識並不多，栢寜表示香港都算多滑板舖，其實都係要睇自己喜唔喜愛，而栢寜就推介8five2shop，因為8five2shopg賣的滑板品牌係栢寧比較鍾意嘅品牌，大家可以因應個人喜好去揀自己鍾意嘅滑板。
栢寧亦都創立左自己嘅滑板品牌「PN18」，每個運動人都有自己的故事、代表自己的標誌物，栢寧就將有代表佢嘅標誌物真真正正創立出來，而當日栢寧都著左自己設計的個人品牌「PN18」，記得上去佢Instagram支持一下！IG : babypakning
「以前拎住塊板，啲人就會覺得呢個人係曳架啦！街童！」
在外國，街上玩滑板是正常不過的事情，但在香港可能令人錯以為滑板只能在滑板公園內進行，以及玩滑板就是曳。「我記得2000年玩滑板嘅時候，香港未係好多滑板場地，以前踩滑板通常喺啲球場，執啲磚頭、執啲木板自己砌啲台。以前通常都會俾人投訴，甚至乎會掟嘢落嚟，叫我哋唔好嘈，咁啲人咪會覺得我哋呢班人就係曳囉」滑板成為奧運項目後讓更多人認識到這項運動，市民開始改觀「我都覺得大家對滑板個睇法唔同左，多咗啲家長帶啲小朋友落嚟滑板場玩滑板。政府搞多啲比賽推廣最好，而家大部份比賽都係私人團體搞，或者撥多啲錢或者資源宣傳，間中見到有啲滑板場會搞一啲同樂日，但其實冇乜人知」
滑板帶給你什麼？
「我教滑板教咗三年幾，最大得着就係要自己要努力踩返滑板，因為咁先對得住啲學生，唔可以齋講但自己踩唔好，所以自己都要好勤力咁踩。同埋見到佢哋成功做咗一個動作，我會好開心，甚至開心過佢哋自己」小編有個疑問，小朋友玩滑板應該會好驚，點解會繼續玩？栢寧就有自己一套睇法「繼唔繼續玩其實都好靠佢哋自己，我覺得跌倒就等於進步一次囉，因為當你跌到十幾二十次嘅時候，你就唔會再怕跌架啦，你慣咗就唔會再喊。其實睇住佢哋成長，我自己都成長埋一份。」
「頭幾次跌到會喊，第四五次會跌到呆咗，第十次之後就會笑，跟住自己起翻身再黎」
難忘經歷
栢寧講到3年前第一次教班，遇到極大挑戰，第一日就搞啲咁嘅嘢「我本身英文唔係咁好，好記得我教第一堂，個朋友就俾咗三個講英文嘅學生我，心諗係咪玩我呀，最後我就要用自己有限嘅英文，同埋方式去表達，結果都handle到，唔試過又點知得唔得呢！仲有一次係我自己受過最嚴重嘅傷，就係大拗柴，都要休息成個幾月，都幾誇張」
當我們迷失時
迷失及樽頸位係人生必須經歷，栢寧都一定體驗過「以前到而家都會有一啲樽頸位過唔到，例如我最近練緊一啲動作，我就會每日拎電話拍低，每日著唔同嘅衫，睇吓自己幾多日幾多個鐘先成功，我一定要試到得為止，滑板仔多數都係咁㗎。」「我自己都迷失過架，有一段時間夜晚掛住玩，晚晚都出去飲酒，玩到朝早起身都唔會想去踩滑板，玩果陣係開心嘅，識到女仔。鼓勵吓啲青少年，迷失唔緊要呀，早啲迷失好啲，幾十歲先迷失就大件事，有得迷失就趁早迷失，迷失就搵啲朋友傾吓偈啦！」
「早啲迷失好啲，有得迷失就趁早迷失」
Never Give Up代表什麼?
訪問最後秉承以生命影響生命，每位都會分享Never Give Up 對嘉賓代表什麼「套落我地滑板身上係啱晒，例如你做一個動作，你係需要不停做，做到一次都唔代表你成功，你係要不斷嘗試，做到個動作熟咗，先叫做成功。有時可能要做一百次或者一千次都唔成功，但做到一千零一次成功咗，咁你就會好開心好有滿足感，開心到瀨屎」「做唔到個動作，諗清楚先去試，有時我會合埋眼諗邊度出錯呢？或者再簡單啲，set低個機，慢動作拍低自己個動作，逐格逐格睇究竟做錯啲咩。再唔係打開YouTube，睇吓人哋個動作點做。」一眾滑板愛好者，不要放棄，一齊加油！
「你係需要不停做，做到一次都唔代表你成功」
By Ho.W.K.
NGU
