Veronica Yue 余顯穎 – 香港非撞式欖球運動員「我會對我自己嘅人生 Never Give Up!」

【Never Give Up 專欄】不知道大家身邊會否有朋友性格很活躍、坐唔定、不能夠悶、24小時會用盡、生活十分充實的金牛座朋友?今次 Never Give Up 邀請了我們首位女嘉賓,絕對符合以上5項特點,而且還是多項運動的精英,她就是 香港「非撞式欖球Touch Rugby」運動員 — Veronica 余顯穎(阿魚)!

「Hello!我係余顯穎!我係非撞式欖球運動員!」
整個訪問與拍攝都充滿歡樂,當我邀請阿魚介紹一下自己,她隨即自己大笑:「等我諗一諗先,講"生平"呀麻?OK!Action!」阿魚開朗活潑的性格,令訪問過程都很輕鬆。原來她成為 非撞式欖球運動員 前都參與過很多運動項目。
「我而家係一位大專講師,亦都係非撞式欖球運動員。我細個其實主要係玩田徑,跑步為主,然後發展到玩健身,都有參加過健身比賽。出左黎做野先真正接觸欖球。當時係打「傳統欖球」(Contact Rugby),但因為膊頭傷患,之後就轉左玩「非撞式欖球」(Touch Rugby),相對衝撞冇咁大。」

「我細個坐唔定,鍾意跑跑跳跳。入左田徑隊就可以 攞正牌咁跑跑跳跳,唔洗俾老師鬧。」
田徑跑步健將
阿魚由小學已經開始玩田徑,原因係因為本身性格坐唔定,鍾意跑跑跳跳,上堂經常俾老師鬧「入左田徑隊可以攞正牌咁

「我鍾意乜都學,人一世物一世,乜都試下!有機會就會去試下!」
大專轉換運動項目(田徑、越野跑、健身、單排滾軸溜冰)
完成中學後,阿魚入讀運動教練學高級文憑課程,接觸了不同種類運動,當中投放最多時間是 Inline Skating 單排滾軸溜冰及健身,而兩個運動項目都有考取教練牌照「好多唔同運動我都想試,大專放最多時間係 Inline Skating 同 Fitness。身邊嘅同學空堂一得閒都會入健身室Hea (休息) 下,但佢地所謂嘅Hea (休息) 下,原來係操野做Gym,所以我得閒又舉幾下,慢慢老師見我幾有興趣,就建議我繼續係健身發展落去,再參加埋比賽。我見人一世物一世,乜都試下!有機會就會去試下,樣衰左咪樣衰左囉!」
除了跑步、跳高、越野跑、健身、單排滾軸溜冰、考取不同的運動教練牌照,阿魚只要有機會接觸運動,她都一定會試。「我個人都好跳脫嘅!我好鍾意試新野同埋學新野,只要有機會就會試。啲人可能會覺得我「百足咁多爪」,但我就係鍾意乜都試!」

「接觸Rugby係因為覺得夠刺激,好正!返唔到轉頭!有隊友一齊進步嘅感覺好好!」
接觸傳統欖球,愛上欖球
阿魚讀書時期已經很想接觸欖球,奈何「百足咁多爪」分身不暇,直至畢業後出到社會工作,機緣巧合下見到在欖球總會推出 Rugby Summer Course,所以就報名參與,從而接觸欖球。之後更跟隨教練進入了她的第一隊女子欖球球會「University Rugby Football Club – URFC」,開始有系統性地一星期兩天訓練。
「當初接觸Rugby係因為覺得佢夠刺激,好正!好考反應,個波可能會突然出現係你眼前,又可以全速跑!其次就係可以認識到好多朋友,有隊友一齊進步嘅感覺好好!我鍾意團體運動,雖然我之前玩嘅運動都係個人運動,但接觸左Rugby就返唔到轉頭。」

「有一次我落 Tackle 放鬆左,膊頭受傷,慢慢發展到慣性甩臼。我仲繼續打左 Rugby 兩年。」
肩關節習慣性脫臼
參與運動的人都十分明白一件事,傷患永遠是運動員最大敵人,阿魚都要面對運動員的死敵「係 University 我係做 Fullback,姐係一隊人最後嘅防守者,對手係會全速衝過黎準備得分,所以衝激力比較大。有一次我落 Tackle (擒抱) 防守對方,可能我放鬆左,導致膊頭受傷,慢慢發展到 慣性甩臼 (肩關節習慣性脫臼)。」
但受過傷先知道要堅強,作為一個喜歡運動的人,在傷患面前不能畏縮退讓,無礙阿魚繼續玩欖球「我受傷之後繼續玩左兩年 Tackle,因為我隊波個 Bonding (鏈結) 好好,大家都好Friend,唔想自己無啦啦唔打,好想同佢地繼續打波,所以傷左都打。其實係應該休息,做好個復康先繼續打嘅。」其後阿魚接觸了非撞式欖球 Touch Rugby,玩法與傳統欖球不一樣,顧名思義,非撞式欖球不會有猛烈的衝撞和擒抱,在比賽中,只能以最低力道觸碰對手阻擋對方進攻。阿魚現在球隊是「Zion Touch Football Club」。

「當初冇諗到咁遠,亦冇追住要成為香港運動員做目標,純粹我鍾意玩呢個運動,繼續練習。」
成為香港「非撞式欖球 Touch Rugby」運動員
2024年7月中 在英國會舉辦一個四年一度非撞式欖球世界盃,有不同國家參與這個盛事,香港亦派出了不同類別的代表隊伍,包括男子隊、女子隊、男女子混合隊,而阿魚則被選拔了成為 香港男女子混合隊 代表,球隊名稱:Hong Kong China Mixed 30s。「Touch Rugby 呢個運動係第一次代表香港到外國比賽,我覺得機會唔係成日都有,所以一有機會就要試。其實我當初冇諗到咁遠要成為香港運動員,我冇追住佢做目標,純粹我鍾意玩呢個運動,Keep住練波繼續打比賽。」

「最感謝係屋企人,佢地係我嘅決定入面冇講過:「唔應該」三個字」
最感謝的人
「其實遇到嘅所有人都好感謝。但係最感謝嘅係屋企人,原因係我成長路上做所有決定佢地都好支持,所以點解我乜都夠膽試。屋企人係我嘅決定入面冇講過:「唔應該」三個字。我覺得真係由細個影響,佢地支持我每一個決定,所以一路成長我都唔會驚做錯決定,或者諗:得唔得架?我乜都會夠膽試!」
「由細到大,屋企人支持我每一個決定,所以一路成長我都唔會驚做錯決定。」

「係香港呢個環境,好多家長都會想小朋友讀好啲書,或者專心玩死一樣運動,玩專佢,唔好樣樣試。反而我屋企人細細個就俾我試唔同興趣班,可能每年都唔同,每次學完都會問我有冇興趣,而唔係安放佢地想我學嘅野,佢地會睇我鍾唔鍾意。」

Never Give Up對你代表什麼?
「Never Give Up對我黎講係"唔好放棄",但"唔好放棄"係咪等於"堅持" 呢?我又覺得唔係。對我自己黎講,我未必係"堅持"上面咁有決心,但係"唔好放棄"上面我會比較有決心。我會對我自己嘅人生 Never Give Up!點解我會學咁多野增值自己、接觸咁多新鮮嘅事物?因為我人生只得一次,我會想由我去決定我去接觸啲咩、有咩回憶。」
「我會對我自己嘅人生 Never Give Up!我人生只得一次!」

「而家香港有好多人會因為返工呀,冇時間呀,就會放棄某啲野,淨係工作。我會覺得人生唔係咁樣,所謂堅持份工作,朝十晚十咁樣去工作,某程度上,我覺得呢個唔係堅持,係放棄左自己人生!」
最後我問阿魚,其實你又要工作,又要旅行,又要玩,又要咁密集練波,啲時間點處理?你唔攰咩?「攰架!但可能我M底(被虐)!我覺得好充實。從來冇冇時間呢樣野,係取捨!」
「堅持朝十晚十咁樣去工作,我覺得呢個唔係堅持,係放棄左自己人生!」
今年 7月阿魚會去英國參加 4 年一度 非撞式欖球 Touch Rugby 世界盃,香港運動員 需要自費$25000 -$35000 參加比賽。希望大家多多支持 香港運動員!歡迎到 Hong Kong China Mixed 30s 同阿魚IG,為佢地打打氣!
Never Give Up 其中一個成立目標,是希望有足夠經費繼續營運外,我地將來好想可以有資金資助 香港運動員 到世界各地比賽!只要堅持,我相信我地一定做得到!
一齊支持仍然在運動上堅持的人!加油!
By Ho.W.K.
NGU
IG :
Share
