【Never Give Up 專欄】「患上癌症」相信沒有人希望人生中會接觸這四個字，不論是自己或身邊的人，最好這一輩子都不會遇上。因為在整個治療旅程中，病人和照顧者均會遇上不同的問題及挑戰。病人會恐懼、焦慮和忐忑不安，可幸的是「愛」會不知不覺間湧現，身邊有不離不棄的照顧者，令病人感到沒有失去什麼，反而得到更多。

當我知道這次 Never Give Up 的訪問對象是一位行山愛好者，也是一位乳癌三期的抗癌戰士，內心都有一點戰戰兢兢。她很想分享在癌症抗戰及運動跑道上的一點一滴，著實幫助在賽道上跌倒的同路人，給他們一點正能量。初次見面，我看見一位打扮美美的女士，坐在日本餐廳的Bar枱，枱上有一杯紅酒。

 

「你好！我係Vivian！」

Vivian 在2022年11月 確診了乳癌三期，她每半年會做一次婦科檢查，一年做一次乳房檢查，有一日她無意間發現自己乳房有硬塊，正是距離她做檢查後的三個月。「睇電視嘅時候，無意之間摸到乳房有硬塊。摸摸下，嗰個觸感係硬架，好似有啲痛，跟住覺得唔對路，毛管就動啦，覺得係嗰啲嘢（癌細胞）！」

「摸摸下（乳房），嗰個觸感係硬架，覺得係嗰啲嘢（癌細胞）。」

刻不容緩。分秒必爭

Vivian 沒有半點怠慢，亦沒有浪費任何一分一秒，她知道必須立即果斷處理，沒有時間去沉澱自己情緒。「我冇諗咁多，覺得要即刻處理！係即刻！其實如果當時唔係夜晚，果晚就已經去左睇醫生。」「打電話去約，好好彩可以打到尖，因為通常要預約，我同姑娘講，我話我真係好急，我發現我有硬塊，咁姑娘都俾我打尖。「跟住第二日收工就即刻去做檢查，見我個婦科醫生、做夾胸、抽組織、抽針。婦科醫生就寫紙俾我去 lab 度做檢查，化驗後就發現已經係乳癌第3期啦。」

 

「我冇時間諗，要即刻處理！一發現已經係（乳癌）第3期啦。」

重要的決定

相信任何確診癌症這個壞消息的病人，心情想必是晴天霹靂！由發現乳房腫瘤到做手術，只是短短15天。Vivian 收到確診報告後，不感到驚訝，反而果斷地作出決定治療方案，絕對不容易。「我係接受嘅。我淨係知道我要盡快醫。我搵咗乳房科唔同嘅醫生，佢哋都係俾我自己去選擇，四個醫生都係好出名嘅醫生。」

 

「我心裏面都有個答案，決定整個乳房都唔要！」

「好好彩我個瘤冇去到乳頭嗰度，只係喺乳房側邊，我可以做四份之一（切除），亦都可以做完全切除。其實我見完四個醫生之後，我心裏面都有個答案，但好似劇情需要，要諗吓啩。所以我都有返去糾結吓，但其實我已經知道我唔可以要㗎啦，所以決定左整個乳房都唔要！」聽Vivian分享到這裡，我不禁問她，她的果繼及勇氣那裡來。她說道：

「因為我愛我身邊嘅人，身邊嘅人個個都好着緊我、好愛我，我唔想佢哋擔心。我要活下去，我唔可以有事！」

喜歡行山。享受行山

Vivian 是一個行山的愛好者，其中一個令她不能倒下、堅持下去的動力，就是行山。「我好鍾意運動，好鍾意行山，我喺度諗：我有咩事我點樣行山呀？我仲有好多個山要行。我屋企有個香港十大行山路徑，其實我行咗好少，我仲要繼續行落去。」

「我有咩事我點樣行山呀？我仲有好多個山要行！」

Vivian 認為健康很重要，平常都有行山的習慣，難度高低的山路都嘗試過，例如不同地方的水塘、千島湖、也挑戰過九逕山、針山、青山夜行等等⋯「行過最深刻嘅山係九逕山同釣魚翁，行九逕山我喺上面蕩失路，好辛苦、好難行，手腳並用，我自己覺得係四五星。行普通水塘唔係好滿足到我，我鍾意挑戰自己。我係溫室長大，唔知點解年紀越大就越好勝。」

 

「我享受好辛苦嘅過程，我特別鍾意行辛苦嘅山！」

Vivian職業是一位診所護士，每天會遇到不同類型的病人，更加明白運動與健康的重要性。「除咗行山，我會玩瑜伽。可能因為我做呢一行，我見到好多老人家，有做運動同埋冇做運動嘅人，身體相差好遠！逢星期六我都會行山，一個星期一定最少行一日。因為之前治療緊，同埋身體需要時間 Recover，我就會行吓青山公路、城門水塘、龍脊、小西灣柴灣東涌嗰啲路，我明白休息係為明天走更遠更陡峭嘅路。」

 

「我要健康，所以要keep住運動！」

「我落第一化療針之前有行山，第二針前都去咗行山，上咗千島湖、元荃古道等等。化療行山其實好辛苦，但係我好開心，心情係影響病情。係辛苦㗎，因為會唔夠氣，亦都怕會有感染，又要戴住口罩，因為一感染就好大件事。但我知道自己個抵抗力OK嘅，我對自己有信心！」

 

「心情係影響病情。我對自己有信心！」

手術後的後遺症

Vivian 需要服用五年抗癌荷爾蒙藥，藥物為身體及情緒都帶來不少的副作用。「我已經切除淋巴，同埋唔可以發力。如果我動作大同埋熱嘅話，我隻手係會腫，每一日就要按摩，要輕輕掃。但係有陣時人都會懶㗎嘛，唔按就會麻痹。」「都會有骨痛同埋炆憎，情緒都有影響，但我會控制返自己情緒，因為知道係食藥影響，會提醒返自己唔好炆憎！」

 

「我乳房重建係用 腹直肌 搬上去個乳房度，而家做腹嘅動作，係會麻痹發唔到力！」

在生病前，Vivian 已經喜歡瑜珈及行山，恆常運動令她的康復之路，不用走太多冤枉路。「醫生話我要兩至三年，先可以做到瞓喺度直接起身嘅動作，但我做完手術化療之後，已經可以做到呢個動作，其實我 Sit Up 都做到，只不過我冇特別強迫自己去做。」「我知道運動好重要！我要成日拉筋，因為如果我啲手只要唔拉筋兩日，即刻伸唔直！我個腋下有個疤痕，唔拉筋個傷口就會扯住咗，個胸會長期感覺到麻痹。」

 

「手術後，我個肚有條 42 cm 長嘅疤痕，行山用腳力都會有拉扯痛感，亦都提示自己對人生唔好放棄！」

 

處理煩惱絲 - 脫髮

很多病人都會對化療後出現大量脫髮感到不安。Vivian 索性先下手為強，在開始化療前，把頭髮剃光，避免面對大量掉髮的恐慌。「我冇俾佢甩，我唔俾機會佢甩！我唔想好似啲劇情咁樣執起啲頭髮喊，所以我剃晒佢！我唔想面對自己掹出嚟一執頭髮，然後問自己係咪要喊呀？我好貪靚㗎，淨係知道要快啲剃咗佢，我唔想面對一撻一撻，我唔需要經歷呢啲劇情。」

 

「我唔想好似啲劇情咁樣執起啲頭髮喊，所以我剃晒佢！」

勇敢的 Vivian 在化療期間，如常地打扮自己，迎接及享受她獨一無二的經歷。「唔係個個都有咁嘅機會（光頭），如果有呢個機會就應該要好好享受。我必須要經歷，所以迎接佢，好過抗拒佢。我有帶頭巾、有帶假髮。我仲自己買刀片刮到貼晒，費事一撻一撻。」

 

生病前及生病後最大的轉變

Vivian 形容自己一直性格都很好勝及任性，生病後整個人都改變了，比以前更正面、更謙虛、更懂得愛。「我以前癲起上嚟都好癲㗎，病咗之後成個人唔同咗。我珍惜咗朋友，個人冇咁招積，謙虛咗好多，知道愛。以前我唔會攬我爸爸，所有人都唔會抱抱，自從病完之後，我會抱抱佢哋，我會攬佢地，我覺得冇咩嘢，就係愛。」

 

「自從病完之後，我會攬佢地，大家表露晒出嚟，我覺得冇咩嘢，就係愛。」

 

「我都係好剛強嘅人，以前我同爸爸講幾句說話，就會鬧交，但佢好愛我㗎。自從病咗之後，大家表露晒出嚟。最近嗰次同佢去日本，佢攬住我，我攬住佢，其實講左兩個字㗎咋「乖女」，其他乜都冇講，用力咁樣攬住佢，係幾十歲人未試過咁用力攬住個老竇。所以我係得到比失去多，我冇失去野架其實！」

 

「我失去咗只係壞咗嘅嘢，我得到比失去多，唔經歷過係唔會覺得身邊嘅嘢咁寶貴！」

 

特別感謝的人

「我感謝 Meina（朋友） 、我感謝我男朋友，男朋友其實乜都冇講，默默地。佢話只要我冇事，你開心就得啦，你做你想做嘅嘢。我手術後未有自理能力，好似廢人咁，有一次癲咗咁樣喊，男朋友攬住我俾我喊，佢話你係需要喊㗎。就係咁樣默默地。」Vivian與男朋友感情十多年，治療期間，男朋友和朋友都默默地在她身邊支持及照顧，給她正能量。

吸引力法則 — 不論是正、負面的頻率，吸引力法則都會給你更多相同的東西。Vivian 也很認同。「我係呢段時間我好開心、我好正能量、好正面，我遇到嘅嘢都好正面，就算路人甲都對我好好，我覺得我好幸運！」

 

Never Give Up 代表什麼？

Vivian 手臂上有一個紋身，刻著「Never Give Up」，及有一塊四葉草。「係我自己設計，最後嗰個位係一塊四葉草，代表幸運。我曾經有隻狗仔離開左，有一段時間有抑鬱，唔開心咗幾年，一直都放唔低。我將佢（狗仔）紋喺我身上，都未釋懷，跟住我決定紋一句金句，去提醒自己，我唔好放棄自己，所以紋左 Never Give Up。所有嘅嘢都唔好放棄。」

 

「生命、人生、你想做嘅嘢，都唔好放棄！點解要放棄？」

生命影響生命。整個訪問我都被 Vivian 的經歷所感動，我記得她當中有一句說話：「愛 係要感受㗎，唔係講就有，係要感受！」Never Give Up 創立其中一個目標是希望以一人一故事感染你，一同感受每個愛運動的人獨一無二的經歷。Vivian 你很美、很堅強、很厲害！加油！

 

By Ho.W.K.

NGU